सल्यान, कात्तिक १७ गते । सल्यानको दार्मा गाउँपालिका–३ फारुलाचौरमा हिलेखाली मेलाको अवसरमा खेलकुद प्रतियोगिता आयोजना हुने भएको छ। हिलेखाली मेला व्यवस्थापन तथा सञ्चालन समितिको आयोजनामा दसैँ–तिहार तथा छठ पर्वको अवसर पारेर खुला पालिकास्तरीय पुरुष भलिबल, महिला भलिबल र ब्याडमिन्टन प्रतियोगितासहित बृहत् सांस्कृतिक कार्यक्रम सञ्चालन गर्न लागिएको हो। आयोजकका अनुसार खेलकुद प्रतियोगिता २०८३ कात्तिक २७ गतेदेखि सुरु हुनेछ। कार्यक्रम श्री जनज्योति माध्यमिक विद्यालयको प्राङ्गण, दार्मा गाउँपालिका–३ फारुलाचौरमा सञ्चालन हुनेछ।

प्रतियोगिताअन्तर्गत पुरुष तथा महिला भलिबल र ब्याडमिन्टनका विभिन्न विधामा प्रतिस्पर्धा गराइनेछ। पुरुष भलिबलतर्फ प्रथम पुरस्कार दुई लाख ३४ हजार ५७६ रुपैयाँ र दोस्रो पुरस्कार एक लाख २३ हजार ४५६ रुपैयाँ राखिएको छ। महिला भलिबलतर्फ प्रथम हुने टोलीले ५२ हजार २२२ रुपैयाँ र दोस्रो हुनेले ३३ हजार ३३३ रुपैयाँ प्राप्त गर्नेछन्। ब्याडमिन्टनतर्फ प्रथम पुरस्कार १५ हजार र दोस्रो पुरस्कार १० हजार रुपैयाँ तोकिएको छ। प्रतियोगितामा सहभागी खेलाडी तथा टोलीलाई ट्रफी, मेडल र प्रमाणपत्र समेत प्रदान गरिने आयोजकले जनाएको छ। यसका अतिरिक्त स्थानीय लोकदोहोरी, रस्साकस्सी, माले तान्ने, घैँटोफोर तथा व्यक्तिगत विधाका खेलकुद प्रतियोगितासमेत समावेश गरिएका छन्।

आयोजक समितिले प्रतियोगितामा सहभागी हुन इच्छुक खेलाडी तथा टोलीलाई निर्धारित समयभित्र नाम दर्ता गराउन आग्रह गरेको छ। पोस्टरमा उल्लेख भएअनुसार दर्ता गराउने अन्तिम समय कात्तिक २७ गते बिहान १० बजेसम्म रहेको छ। प्रतियोगिता तथा सांस्कृतिक कार्यक्रमले स्थानीय खेल प्रतिभाको पहिचान र प्रोत्साहन गर्नुका साथै कला, संस्कृति र आपसी सद्भावको संरक्षणमा सहयोग पुग्ने अपेक्षा गरिएको छ। आयोजक समितिले खेलकुद र सांस्कृतिक गतिविधिमा सहभागी भई कार्यक्रम सफल बनाउन सबैलाई आग्रह गरेको छ।