सल्यान २६, सल्यान । निर्वाचन नजिकिँदै जाँदा सल्यान जिल्लामा नेकपा एमालेप्रति जनलहर बढ्दै गएको छ। विभिन्न दल परित्याग गरी एमालेमा प्रवेश गर्नेको क्रम तीव्र बन्दै गएको छ। यसैक्रममा आइतबार जिल्लाको कपुरकोट गाउँपालिका वडा नं. २ दानबाङमा आयोजित पार्टी प्रवेश कार्यक्रममा नेपाली कम्युनिस्ट पार्टी परित्याग गरी ओमप्रकाश बुढा र पार्वती बुढा नेकपा एमालेमा प्रवेश गर्नुभएको छ। त्यस्तै, शनिबार कपुरकोट गाउँपालिका वडा नं. २ मै आयोजित अर्को पार्टी प्रवेश कार्यक्रममा नेपाली कम्युनिस्ट पार्टी परित्याग गरी तिलक विक र सुनीता चन्द नेकपा एमालेमा प्रवेश गर्नुभएको छ भने यसैबीच २०७९ सालको स्थानीय तह निर्वाचनमा कपुरकोट गाउँपालिका वडा नं. ३ बाट सदस्य पदका उम्मेदवार रहनुभएका मोहनलाल बाठा पनि नेकपा एमालेमा समाहित हुनुभएको छ । उता, त्रीवेणी गाउँपालिका वडा नं. ३ निवासी चन्द्रमुखी वलीले राष्ट्रिय स्वतन्त्र पार्टी परित्याग गरी नेकपा एमालेमा प्रवेश गर्नुभएको छ।
उहाँ एमालेमा फर्किनु एमालेप्रतिको बढ्दो जनविश्वासको प्रमाण भएको स्थानीय नेताहरूले बताएका छन्। त्यसैगरी नेपाली कांग्रेसका क्रियाशील सदस्य त्रीवेणी गाउँपालिका वडा नं. ६ निवासी समिर गिरीले पनि नेपाली कांग्रेस परित्याग गरी नेकपा एमालेमा प्रवेश गर्नुभएको छ। शुक्रबार एमाले पार्टी कार्यालय लुहाममा आयोजित कार्यक्रममा एमाले सल्यानका नेताहरूले उहाँलाई स्वागत गर्नुभएको हो । निर्वाचन नजिकिँदै जाँदा विभिन्न दल परित्याग गरी एमालेमा प्रवेश गर्ने क्रम बढ्दै गएको र सल्यानमा नेकपा एमालेको जित सुनिश्चिततर्फ अघि बढेको नेताहरूले दाबी गरेका छन ।
