पछिल्लो समय कोदोखेती गर्नेको सङ्ख्या घट्दै

सप्तरंगी अनलाइन

मंसिर २५, सल्यान ।

सल्यनमा पछिल्लो समय कोदोखेती गर्नेको सङ्ख्या घट्दोक्रममा छ । सल्यानका १० स्थानीय तहमा अधिकांश किसानले कोदोखेती गर्न करिब छाडिसकेका छन् । विगतमा जिल्लाको कुमाख गाउँपालिका, बनगाड कुपिण्डे नगरपालिका र शिद्धकुमाख गाउँपालिकामा कोदोको राम्रो उत्पादन हुन्थ्यो । यहाँका फाँटहरूमा लहलहाउँदै गरेको कोदो देखिन्थ्यो तर केहि वर्षयता यस ठाउँमा कोदोको खेती तेति हुने गरेको पाइँदैन । दशक अघिसम्म पाँच क्विन्टलसम्म कोदो उत्पादन हुने बारीमा अहिले एक क्विन्टल पनि उब्जनी नहुने गरेको स्थानियले जानकारी दिए ।
दैनिक उपभोग्य सामानहरू घरदैलोमा पुग्न थालेपछि यसको खेती गर्नेको सङ्ख्या घटेको पाईन्छ । कोदोबाली अत्यन्त पोषिलो मानिन्छ । विगतमा यसको रोटी खाने गरिन्थ्यो । तेस्तै गाउँघरमा मदिरा बनाउन पनि कोदोको प्रयोग गर्ने गरिन्थ्यो । जिल्लाका स्थानीय तहले खाजा नास्तामा स्थानीय उत्पादन वा रैथाने बालीहरूको प्रयोगमा जोड नदिएका होइनन् तर कोदोको उत्पादन कम हुने भएकाले बजारमा यसको पिठो माग भएपनि उपलब्ध गराउन नसकिएको अवस्था छ । कोदोमा क्याल्सियम,म्याग्नेसियम, फस्फोरस, म्यागनिज, भिटामिन बी लगायत पोषक तत्वहरू पाइने गरेकाले पछिल्लो समय माग भने बढ्दो छ । तौल घटाउन, मुटुसम्बन्धी रोग नियन्त्रण, पेट स्वस्थ राख्न पनि कोदोका परिकार उपयुक्त हुने जानकारहरू बताउँछन् । जिल्ला कृषि विकास कार्यालय सल्यानको तथ्याङ्कअनुसार हाल जिल्लामा ६ सय ८५ हेक्टर क्षेत्रफलमा कोदोखेती हुने गरेको छ । उत्पादनको हिसावले सल्यानमा १२ सय ७० मेट्रिकटन कोदो उत्पादन हुने गर्दछ ।

Post Views: 274

प्रकाशित मिति : २०८१ मङ्सिर २५ गते मङ्गलवार